يا مأمنه للمجلس .....أهو قاعد على نفسنا كلنا و متمجلس ......انطباعات مواطنه

المقال ده حيتناول انطباعات أكتر من حقائق أو أدلة و تواريخ كلنا عارفنها  - أنا حكتب عن إللي بعيشه  كمواطنه مصريه  في وجود المجلس الأعلى للقوات المسلحه على عرش مصر ..

ابتدت علاقتي مع الجيش المصري في أواخر أل ١٨ يوم بتوع التحرير. و ما اكديبش عليكو ماكنتش بنام الليل بسبب كلمة الجيش... كل اللي حصل كان كوم....و نزول الجيش و إنه يكون طرف كان كوم تاني!

 كنت بستغرب أوي فرح الناس بدخول الدبابات .... و كان قلبي في حالة تأهب على طول....  و كنت و لازلت باستغرب  أصلا كلمة  "لا... إلا الجيش - ده الجيش وطني" .  يعني إيه الجيش وطني ؟؟؟؟ و إيه التقديس الغريب ده لكيان من كيانات دولة مبارك الفاسدة...

هو مش الجيش ده و المجلس ده جزء و جزء حيوي كمان من دولة مبارك البوليسية؟  مش هما زمل يعني؟ هو و النائب العام (الرجل ده برضو لازم نذكره  معانا بالخير). يعني  لو إدارات مبارك واكل فيها سوس الفساد لما عملها غربال إيه إللي  إلي حيخلي أكتر جهاز متعتم عليه في الدولة الفاسدة دي يبقى شريف لا مؤاخذة ؟

المهم من ساعتها و أنا الفار لعب في عبي و كنت ساكتة مش عارفة أقول إيه  - أدينا بنتفرج  - و بعد كدة ابتديت أقول لا في حاجة غلط  - و ألاقي الناس بيتقنعني إني مش فاهمة - أو إن لا ده جميل خالص طنطاوي ده. و بعدين لما التعذيب في المتحف ابتدا قالولي : لو ليك عند الجيش حاجة قوله يا سيدي !

و حصلت كل الأحداث إلي كلنا عارفينها: إعتقال المتظاهرين و تعذيبهم، مع التراخي التام في الإمساك بلبلطجية الحقيقيين و فتح السكه لجمال موقعة الجمل و تسييب السلفيين علينا. و الاستعباط في الإستفتاء على الدستور و الخدعة بتعت البيان الدستوري. و إصدار قوانين مجحفة مين طيز أمه لامؤاخذة زي قانون تجريم الاعتصامات و خلافه
المهم - كلنا عارفين إلي بيحصل كل يوم و كل ساعه

الخلاصة :

الفار إلي كان بيلعب في عبي كبر حبة حبة ا لما بقى فيل كاتم على نفسي  و النهارده فرصه بقه الم كل الحاجات إلي كنت بقولها قبل كدة بالقطارة و أحطها في حتة واحدة عشان المجلس الموقر ميعدش يدور كتير و نريحه من بلاليين جس النبض دي  :

• أهم مهام المجلس العسكري إنو يلعبنا دوخيني يا لمونة و ينهكنا عصبيا و عقليا و ماديا - عشان نستسلم و نرضى بالفتات إلي بيريمهأ لنا

• على عكس الوطنية و النبل إلي في خيال الرومانسيين - المجلس كل تصرفاته فيها ١. نداله ٢. ملاوعه ٣. استعباط و استنطاع ٤. خبث ٥. استبداد ٦. وطي ٧. كذب ٨. إفتراء ٩. تضليل و كل شئ ليه علاقه بالجبن والخداع مش الشرف و الوطنية!

• المجلس  ده مجلس و رجالات مبارك و أي حاجه بيعملها فهي عشان تهدي الشعب و تقتل الثورة و تحجم طموحات الثوار.

• طنطاوي اليوم الوحيد إلي طلع فيه يكلمنا  - كان من على منصة خريجي الشرطه مش في أزمة إمبابة ولا يطفح ولا أي بلوى تانية. و ده يدل بوضوح شديد مش هو ولائه لمين ؟ للدولة البوليسية و ليس الشعب .
•  
• قاللك الجيش سيحمي الثوره!بعد خلع مبارك نوط المجلس الاعلى للقوات المسلحة بمهمة إداره البلاد و ليس حكمها. ولكنه ما صدق بقى يحكم و يتحكم بمزاجه و على هواه -و لصالحه كمؤسسه قبل كل شيء و لاستمرار باقي النظام!أما الثورة والثوار ولشعب والمواطنة و المواطن و الكلام ده كلو خد خازوق كبير!المجلس ده عمره ما مثل شرعية الثورة - و بالتالي فهو فاقد الشرعية من أول لحظه!يسقط جبروت المجلس العسكري! يسقط المجلس الخائن للثورة و شعبها!

خلاصة الخلاصة:

 طنطاوي و مجلسه خونه  - و لازم يمشو عشان البلد حالها ينصلح  - هما فوق الإصلاح و كبرهم و بجاحتهم بتزيد يوم بيوم و.. بيحفرو قبرهم بأيديهم!  عيزين مجلس رئاسي مدني مختار!